Acción, oxetu y públicu
Too al respective de la estructura y el modus operandi del arte de la instalación aporfia en poner en valor la presencia inmediata del espectador; una insistencia que n’últimu casu reincorpora al suxetu (como entidá singular), ensin importar lo fragmentao o disperso que seya’l nuestru alcuentru col arte. Más concretamente, la instalación asitia al suxetu como componente fundamental de la obra, a diferencia del Body Art, la pintura, el cine, etc., que –por asina dicir– nun esixen la nuestra presencia física nel espaciu.
Esta ye la conclusión a la que llega Claire Bishop nel so llibru Installation Art: A Critical History, 2005. Nesti estudiu, Bishop desenvuelve una llectura del arte de la instalación dende los sos comienzos nos años trenta hasta’l presente, basándose nel papel qu’asume la presencia del espectador —yá seya física o sicolóxicamente— dientro de la obra.
Podemos garrar la cita anterior, y sustituyir la palabra espectador por artista. Tamién podemos cambiar performance por instalación y, asina, la conclusión de Bishop resulta igualmente relevante al respective del arte d’acción. Namás que’l suxetu, nesti casu, sería l’artista.
Hasta agora, la mayor parte de la investigación sobre la performance fíxose a partir del so desenvolvimientu narrativu, mentes que l’estudiu del arte de la instalación —como se ve nel llibru de Bishop— centróse nel papel del espectador, y na midida en qu’esti ye activáu pola obra.
Esta diferencia metodolóxica débese a que l’estudiu d’estes dos rames nun reparó bien nel fechu de que l’acción y la instalación, como disciplines artístiques, son espeyu una de la otra. Dambes tán basaes nel mesmu principiu de presencia; de presencia activa. Na performance, la presencia del artista; na instalación, la del espectador. Asina, reflexaes una na otra, instalación y acción garren direcciones opuestes pero superpuestes, creando una exa ente dos polos —l’artista y l’espectador— qu’a lo llargo d’ella existen posibilidaes infinites d’interacción. La performance transitivízase.
PRESENCIA ACTIVA. Acción, objeto y público compónse d’obres —les más d’elles producciones nueves específiques pa esti proyectu— que garren significáu nesta coxuntura. Performance y instalación confluyen, dientro de los espacios del muséu, nun paisaxe variáu d’instalaciones dinámiques activaes polos artistes y/o’l públicu. Atopamos, per una parte, obres onde’l públicu garra un papel más pasivu, y per otra, instalaciones onde la so existencia depende de la so participación. Tamién hai pieces que funcionen en dambos campos. Y en toes elles percibimos un territoriu únicu, un sitiu ente xéneros con rellaciones estratificaes, poco habituales na práctica de la instalación o de la performance pura.