Plug-in Habitat ye un proyectu d’investigación desenvueltu pola artista Paula Nishijima a lo llargo d’una residencia en LLABoral Centru d’Arte y Creación Industrial, cursada nel marcu d’EMAP (European Media Art Platform).
Plug-in Habitat garra’l títulu de la famosa “Plug-in City” (1963-66) ideada pol renomáu grupu d’arquitectura neofuturista Archigram. “¿Qué pue pasar si tola rodiada urbana tuviera programada y estructurada pa cambiar?”, foi l’interrogante que motivó’l trabayu del arquitectu Peter Cook.
La idea d’una arquitectura adaptable al cambéu —presente na visión d’Archigram de la ciudad mutable, organizada a base de cápsules habitacionales prefabricaes y desmontables— manifiéstase tamién na intelixencia de les plantes, cola so estructura modular y distribuyida, ensin control centralizáu pero con una organización cooperativa que va afaciéndose a les condiciones cambiantes del contestu.
En Plug-in Habitat, l’artista investiga eses estratexes adaptatives de les plantes, amás de la so rellación con otres especies y cola rodiada. Adoptando una aproximación de creación d’imaxe por biodiseñu, Nishijima crea unes unidaes modulares inspiraes nesa investigación, que s’interconecten y rellacionen simbióticamente p’afayase de manera conxunta a les alteraciones del entornu.
Nishijima trabaya en collaboración cola arquitecta asturiana Marlén López, cofundadora de Laboratorio Biomimético, un espaciu d’investigación y formación con sede en Llaíñes. El Parque Natural de Redes —reconocíu pola UNESCO como Reserva de la Biosfera nel 2001— foi’l sitiu escoyíu pa facer trabayu de campu con especies locales y coles estratexes biolóxiques que desplieguen p’afayase al rigor climáticu de los montes. El proyectu incorpora tamién una investigación sobre biomateriales (los sos componentes físicos fabricáronse con bioplásticu). Pa desarrollar l’arquitectura funcional de Plug-in Habitat l’artista cuntó cola collaboración de Tobias Seidl, catedráticu titular de Biónica na Westfälische Hochschule de Bocholt, Alemaña.
Plug-in Habitat ye una instalación interactiva, un sistema híbridu compuestu d’un organismu vivu, una planta en coxín que s’atopa nel Xardín Botánicu Atlánticu de Xixón, y dos módulos artificiales. Na esposición, los módulos reciben información de la planta sobre la so manera d’afacese a los cambeos del entornu, estableciendo una comunicación recíproca que dexe que se retroalimenten al traviés d’un bucle d’interacciones que regula’l sistema nel so conxuntu.
L’artista escoyó como fonte d’inspiración y datos plantes en coxín pola so capacidá pa regular, dientro del so “tapiz”, parámetros como la humedanza o la temperatura, ufiertando una especie d’abellugu microclimáticu a otres especies. Estes plantes valieron de modelu a ún de los módulos creaos na residencia de Nishijima. El segundu módulu inspírase na omnipresencia d’estructures puntiagudes y espinoses na la vexetación asturiana. Los famosos “pinchos” constituyen una importante ferramienta adaptativa que, amás de defender les plantes d’animales que s’alimenten d’elles, ayuden a menguar la perda d’agua.
Énte los desafíos qu’acechen a la existencia humana y non humana del planeta Tierra, l’adaptación surde como un elementu fundamental pa encarar el cambéu climáticu y los problemes medioambientales. Si l’arquitectura ye un conceptu humanu qu’implica planificación y control, na naturaleza básase too na medría, la propagación, l’adaptación y la pervivencia.
Plug-in Habitat nagua por una forma de construcción, más orgánica y autoorganizada, al traviés del cambéu, y non de resistencia frente a él. Imaxina un espaciu viviente en forma de proyectos arquitectónicos conceptuales utópicos. Frente a la lóxica neodarwinista de la supervivencia del más fuerte, propón una idea d’evolución que reforcie les rellaciones y interacciones ente axentes.