Paso de Gigantes (2013) remítenos, a manera de cartografía visual, a una xeografía pronosticada: enclaves vinculaos a les tresformaciones del paisaxe por causa de grandes infraestructures d’obra pública n’estáu de suspensión, y a edificios singulares d’ámbitu cultural, científicu o social n’abandonu, construyíos o rehabilitaos con fondos públicos.
Al traviés del arte como métodu d’análisis de la contemporaneidá, encárase’l retratu d’un tiempu y una xeografía al traviés de les sos arquitectures y obres públiques abandonaes, estableciendo una categoría nueva de lo sublime pa la crónica del presente, cargáu d’urxencia de futuros.
Esta videoinstalación multicanal desenvolvióla Cristina Ferrández mentes fixo la residencia de producción de dos selmanes en LLABoral, como aportación del Centru d’Arte y Creación Industrial al Festival Miraes de Muyeres 2014.
El Festival Miraes de Muyeres ye una iniciativa de MAV, Muyeres nes Artes Visuales, una asociación interprofesional y d’ámbitu estatal ensin afán d’arriquecimientu formada por 400 profesionales nel sector de les artes plástiques n’España. El so propósitu ye difundir el papel de la muyer dientro de tolos ámbitos profesionales de les artes visuales, dende la creación artística al comisariáu, la crítica, la investigación y la xestión. Con esti oxetivu, el Festival convida a museos, galeríes, centros d’arte, museos y universidaes a sumase con muestres y actividaes de muyeres artistes a lo llargo del mes de marzu, cola mira d’axuntar un númberu grande d’esposiciones protagonizaes por muyeres y ocupar l’axenda espositiva d’esti mes, a escala nacional y, dende esti añu, internacional.