«El tiempu nun ye una cosa que pase per fuera de nós, una especie de receptáculu del ser. Nós mesmos somos tiempu. Los procesos del mundu alcuéntrense nel tiempu».
Martin Heidegger. Supplements: From the Earliest Essays to Being and Time and Beyond. (1910–1925)
Frutu de la so residencia de producción en LLABoral, Mark Fell desenvolvió Nun puedo iguar lo que tu estropiasti, 2014 [I Can´t Fix What You Broke], una instalación que quier suxerir una Gestalt del mundu propiu más espacial que temporal. Nesta pieza, nueve monitores d’audiu repartiéronse alredor d’una estancia dafechu a escures. Cada monitor produz un solu tonu sintéticu, grabáu por Fell con un sistema modular normalmente utilizáu pa xestionar modulaciones de soníu estremadamente complexes, usando dellos procesos de base temporal. Sicasí, nesta obra, los tonos nun varien dientro d’un marcu temporal (aparte de les inestabilidaes tonales presentes en síntesis asemeyaes).
Al revés que l’énfasis deliberadamente trescendental de gran parte del trabayu tonal, esta pieza fala de la desorientación, l’alliniación y la incredulidá…, el vocabulariu fundamental de la estética de Fell.
Nun puedo iguar lo que tu estropiasti tien un calter específicu a nivel espacial, quier dicise, ta concebíu pal diseñu arquitectónicu del LLABoratoriu de Soníu de LLABoral. Pa esperimentar esta instalación el visitante ha percorrer l’espaciu agarráu a una cuerda que lu guía pela obra. Tanto la selección del artista en residencia como la obra producida ye una propuesta realizada en comuña pol L.E.V. 2014 y LLABoral Centru d’Arte y Creación Industrial.