Esposición d’obres del artista dientro de la programación de la Selmana de les Lletres Asturianes 2021
Nel Amaro (Quentuserrón, Mieres, 1946 – Uviéu, 2011) ye parte (marxinal) (iconoclasta) (multidisciplinar) (vanguardista) de la primer xeneración del Surdimientu lliterariu asturianu. Cultivó’l teatru, la poesía, la narrativa, l’arte postal, la videocreación, la performance. Publicó en castellanu (Habitación de poeta; Boca arriba, lentamente naufragando; El banquete) y, sobre manera, n’asturianu (Antígona, por exemplu; ¡Adiós, Dvorak!; Pruebes d’autor; Cementeriu cívicu; ¡¡¡Falanxista!!!; Entós, cuando ñevaba). Editó fanzinos, impulsó alcuentros d’arte postal y poesía visual, partícipó n’alcuentros internacionales d’acción poética.
Esta esposición recueye fundamentalmente trés facetes de la so trayectoria creativa: poesía visual, arte postal y videocreación. Dialoga con materiales básicos, cuasi refugaya, colos códigos de la publicidá y la cultura audiovisual de mases, y mez técniques clásiques con construcciones qu’escapen, y a veces hasta tán na llende col mal gustu. Diez años depués de la so muerte y cuasi setenta y cinco del so nacimientu, la Selmana de les Lletres Asturianes 2021 rinde homenaxe a un artista irrepetible.