Esposición alredor de la obra del performer, poeta, novelista, dramaturgu y activista cultural Nel Amaro, nel marcu de la programación de les Xornaes de Diseñu Motiva 2015
Hai quien define la práctica artística como l’antítesis de la esfera del trabayu. Y, sicasí, trayectories como la de Nel Amaro faen qu’esta definición nun tenga xacíu. Cuando crear ye también crea-se a ún mesmu, nociones como productividá trescienden la separación ente lo profesional y lo personal, dando pie a una dedicación que va acullá de la xornada llaboral d’ocho hores por cinco díes a la selmana. Si pal artista Richard Long andar ensin una ruta o oxetivu claru pue suponer una forma de creación bien útil pa desvelar les contradicciones de les nuestres sociedaes técnocrátiques, hai qu’entender tamién la vida de Nel Amaro (Quentuserrón, Mieres, 1946-Uviéu, 2011) como una forma d’arte: una tentativa totalizadora y desmaterializada, la de convertir la vida n’arte, que fai de tolos xestos una ferramienta política pa la tresformación social, xunto a una postura vital innegociable énte la realidá.
Presu políticu nel final del franquismu, a partir de los años 70 Nel Amaro publicó llibros de poemes, noveles, teatru, ensayos, cómics, cuentos y artículos. Al traviés del usu del asturianu, la so lliteratura dexaba testimoniu de la problemática social que, entós y agora, viven les cuenques mineres asturianes. Esta muestra documental de la so carrera recueye materiales a partir de 1988, añu nel que se dedica a la poesía visual como parte del colectivu Auxilios Mutuos.
Esta muestra recueye dellos documentos y tamién obres de les sos munches facetes como creador. Dende fancinos o otres publicaciones onde participa, al so trabayu alredor del arte per corréu (mail-art), unviando mensaxes al traviés d’imáxenes y oxetos, y tamién a la poesía fonética y visual pa, finalmente, desembocar n’ámbitu de l’acción. A partir de los años 90 Amaro conviértese nún de los representantes asturianos más destacaos de la performance, amás d’una figura clave pa entender el trabayu en rede enantes de la rede. Davezu los sos trabayos escúendense tres de nomes de dellos colectivos: Arte étnico 100 %, Llaboratoriu Turón Escéntricu, O.N.G. performers sin fronteras, Fundizióm Malevich, Espaciu Arte Escéntricu, etc. Delles veces cuntó cola collaboración d’Abel Loureda o de Rogelio Crespo, y inclusive del so perru Pulgu.
Si la elección de ferramientes, soportes o temes, como escribe Roland Barthes, determina la estructura de la obra y incorpora, amás, al artista a una comunidá de sentíu, el trabayu de Nel Amaro, nel tránsitu per formatos y estilos variaos, desdibuxa les llendes d’unes y otres categoríes. Asina, queda namás el comportamientu del artista como clave pa entender el so determín. Sicasí, nel so trabayu los sentimientos, les maneres de facer, l’humor, les palabres o’l pensamientu, como diría Harald Szeemann, constituyen actitues que, al empar, son formes.