Alcuentru llibre d’artistes, colectivos y críticos, qu’interactuaron, collaboraron y compartieron procesos.
“Nun m’interesa l’arte sinón los artistes”. Esta idea, defendida pol artista Benjamín Rodríguez (Xixón, 1982-2010) baxo’l so alter ego Orson San Pedro, ye’l leitmotiv de Match Box. La so manera de facer favoreció la interrellación con artistes, colectivos y proyectos, configurando’l so currículu vital basáu na necesidá de xenerar acontecimientos.
Match Box ye un alcuentru llibre d’artistes, colectivos y críticos, qu’interactuaron, collaboraron y compartieron procesos. Propuestes específiques, nunos casos básense nel rexistru, la documentación o les collaboraciones más allá de lo técnico pero, principalmente, fundaméntense na rellación con Benjamín Rodríguez.
Match Box busca atopase cola imaxe fílmica y l’espectador nun proyectu interdisciplinar con 28 propuestes que surden de la fricción, interesaes más pol arriquecimientu colectivu implícitu nos procesos que pol oxetu final. El proyectu investiga medios y comportamientos artísticos nuevos, abiertu a la especulación con estratexes diferentes. Lo inesperao ye l’activador d’acontecimientos. L’arte ye una forma de proceder, capaz a inducir a mecanismos de rellación.
Na esposición Match Box, l’artista Alicia Jiménez va facer el proyectu Segunda Cita, un trabayu qu’abre un espaciu de comunicación directa ente desconocíos interesaos en conocer persones.