Drones, vixilancia de mases y guerres invisibles
Los drones convirtiéronse nuna de les armes de guerra más poderoses. Accionaos por control remotu por operadores que tán a miles de quilómetros del escenariu del conflictu, los drones faen ataques aéreos que dexaron yá miles de víctimes mortales en países como Paquistán, Yemen o Somalia. La esposición Llega un grito a través del cielo esplora les cada vez más invisibles tecnoloxíes militares usaes nunes guerres que nos más de los casos desenvuelvense col secretismu máximu y al marxe del control públicu.
Sobrevolando pueblos y ciudaes cola so carga de cámares y armes, los drones convirtiéronse en sinónimu de pavor: un mieu agobiante existencial que, como si d’una alcordanza del futuru se tratare, avísanos del peligru inminente.
Esta esposición y les actividaes asociaes a ella céntrense nel impactu y la llercia xeneraos polos conflictos armaos onde s’usen drones, encarando amás l’ambigüedá ética y llegal de los vehículos aéreos non tripulaos (VANT), la vixilancia masiva y la «guerra a distancia». Y failo al traviés de los trabayos d’artistes contemporáneos que critiquen la manera na que la tecnoloxía y redes militares nos escuenden y aparten de la realidá política y social del conflictu armáu d’anguaño.
El títulu ta garráu de la llinia cola qu’empieza la novela Gravity’s Rainbow (L’arcu la vieya de la gravedá), onde’l so autor, Thomas Pynchon, investiga’l contestu social y políticu que soxaz nel desenvolvimientu del cohete V-2 pol exércitu alemán a lo llargo de la Segunda Guerra Mundial. Les tecnoloxíes pa la guerra usaes anguaño, como les de los drones MQ-1 Predator y MQ-9 Reaper, y los sos misiles Hellfire guiaos por láser, presenten grandes asemeyances col V-2 no que refier a la so capacidá de funcionar ensin ser alvertíos y atacar ensin avisu.
Na domina de vixilancia de mases y guerra invisible surdida depués del programa PRISM, los artistes xúntense a los periodistes y a los activistes pa delatar illegalidaes y poner a descubiertu les infraestructures tecnolóxiques que faen posible que fechos como los ataques con drones pasen. Delles de les pieces presentaes en Llega un grito a través del cielo son poétiques por naturaleza y conviden al espectador a una reflexón tranquila. Otres, sicasí, producen una respuesta nel intre y visceral, faciendo esperimentar la vivencia física del horror y l’aprensión. Y, como davezu pasa cola traxedia, l’humor pue ser el mensaxeru más atrevíu.