LA ZONA ye una instalación artística que presenta de manera didáctica dellos elementos que caractericen la Zona d’Esclusión de Fukushima en Xapón.
La Zona d’Esclusión ye l’área evacuada como consecuencia del accidente nuclear de nivel máximu desencadenáu cuando les fuercies del terremotu y tsunami del 11 de marzu del 2011 chocaron contra la central nuclear de Fukushima Daiichi. 160 mil persones viéronse forciaes a abandonar les sos cases y sitios de trabayu en cuestión de minutos, cuando los edificios de contención qu’abellugaben cuatro reactores empezaron a españar ún tres d’otru, espardiendo pel ambiente les sos partícules radioactives invisibles. La Zona declarada non apta pa l’habitabilidá humana contién un área xeográfica de 800 quilómetros cuadraos alredor de la central destruyida.
Si una serie de televisión de va poco del mesmu nome presentaba una ficción bien documentada onde un accidente nun reactor destruyía una rexón d’Asturies amplia, LA ZONA contribuye con una instalación interactiva presentando pal públicu asturianu y visitantes dellos elementos d’esti territoriu tan particular dañáu poles consecuencies del accidente radiolóxicu.
LA ZONA ye’l proyectu ganador de la VI Beca DKV Seguros-Álvarez Margaride, convocada en conxuntu por LLABoral y la compañía de seguros.