Muestra de los proyectos ganadores del 2.u Premiu LLAB<20, un gallardón que premia l’usu creativu de la tecnoloxía de la mocedá asturiano menor de venti años
Nueve propuestes conformen la Esposición LLAB<20, que recueye los proyectos premiaos y les menciones honorífiques de la II Convocatoria del Premiu LLAB<20. Un gallardón creáu por LLABoral Centru d’Arte que busca dar visibilidá y compartir cola sociedá’l potencial técnicu y creativu de los nativos dixitales asturianos menores de venti años.
La esposición muestra les propuestes más destacaes, feches por alumnos y alumnes d’escueles y institutos de dellos puntos de la xeografía asturiana, como Avilés, Navia, Xixón y Trubia, amás d’otres persones moces que se presentaron de manera individual a la convocatoria.
Caún d’estos proyectos reflexa’l potencial existente en disciplines como la creación audiovisual y sonora, la robótica, la programación creativa o’l diseñu y la fabricación dixital, amás del interés por temes tan distintos como’l patrimoniu natural y arquitectónicu, la conservación del mediu ambiente o les rellaciones personales.
La esposición tamién quier poner en valor les iniciatives impulsaes pol profesoráu d’escueles y institutos, que fomenten de manera orixinal y comprometida la preparación del so alumnáu pal mundu dixital, y implementen, al traviés d’estos medios, un aprendimientu cada vez más interdisciplinar de los alumnos y alumnes.
Dende LLABoral queremos ayudar a la promoción d’un usu críticu y creativu de la tecnoloxía ente la xente mozo, de manera que nun seyan namás consumidores de les ufiertes dixitales. Elles y ellos son los protagonistes d’una xeneración nueva que s’enfrenta a los retos y cambeos derivaos de los avances científicos y tecnolóxicos de la sociedá actual. Maneres nueves de percibir, concebir y rellacionanos col mundu que nos arrodia.
Pa facer la esposición, LLABoral Centru d’Arte y Creación Industrial cunta cola collaboración de la Fundación Banco Sabadell, comprometida cola educación y la sociedá dixital.