Una deriva sonora a los oríxenes de la modernidá
Serendipia ye una narrativa sonora xeolocalizada nel cementeriu civil de Ciares. Trátase d’un rellatu fragmentáu y grabáu en pistes sonores asitiaes n’El Sucu que propón la resolución d’un crime que pasó en Xixón a últimos del sieglu XIX.
La deriva sonora tien como exa narrativa la voz de Margarita Simona, historiadora especializada en feminismu que fai una tesis sobre la figura de Rosario de Acuña. A lo llargo de la so investigación, descubre un crime ensin resolver que pasó en Xixón en 1895. Trátase d’Edgardo del Pozo, pintor simbolista protexíu pol conde de Goncourt, con quien se diz que tien una rellación amorosa. El cadabre de del Pozo atópalu na so mansión de Xixón la so prometida, Gemma Oldman, anarquista catalana defensora de los derechos de la muyer. Al traviés de noticies de radio y periódicos, cites, poesíes, fragmentos d’entrevistes, documentos de la época y el rellatu de Margarita, los visitantes esperimenten una deriva sonora que propón l’articulación ente pasáu y presente, presencia y ausencia, realidá y ficción.