Quien guarda un secretu siempre tien la tentación de desvelalu, anque convive tamién de siguío col mieu a les consecuencies que diba trayer consigo sacalu a la lluz. Pa quien, como nós, tamos ayenos a la situación, los secretos namás resulten interesantes si somos sabedores de qu’existen. De nun ser asina, nun nos esmolecen gota. Sicasí, namás acolumbrar un asuntu hasta entós escondíu, sentímonos impulsaos a descubrilu guiaos por un interés grande. Revelar el secretu pue acabar en desilusión, mentes qu’un secretu bien guardáu que malapenes queda suxeríu ye siempre intrigante y pue dar pie a que seyamos sabedores de la so existencia.
Feather Tales II ye una contorna sensible y interactiva que surdió d’un escenariu imaxinariu onde un diálogu secretu ente ondes electromagnétiques y la so contorna material resulta medio visible, y en consecuencia, encandilador. Les superficies del espaciu de la esposición que tán cubiertes con plumes son hipersensibles a les ondes emitíes polos dispositivos de comunicación móvil. Cuando les señales electróniques frecuenten l’espaciu, les superficies empiecen a mostrar reacciones involuntaries. Estes reacciones preséntense en forma de la erección involuntaria de plumes tamién conocida como “piel de pita”. La piel de pita ye una reacción sicolóxica que pue pasar nos animales en función d’una serie d’estaos emocionales, como por exemplu la irritación, el mieu, l’almiración o’l rixu. D’esa manera, en Feather Tales la existencia d’un diálogu secretu vuélvese visible a los visitantes, mentes que les emociones que lu orixinen siguen siendo desconocíes
La instalación compónse de 200 unidaes reactives con 1000 plumes blanques d’avestruz repartíes pela Sala de Columnes de LLABoral. Cada unidá incorpora un sensor electromagnéticu, un procesador, un servomotor y plumes movibles. Cuando se detecta una señal cerca d’un sensor, les plumes empiecen a temblar y en consecuencia a movese. Les unidaes son sensibles a una variedá de frecuencies que van dende la telefonía móvil hasta’l WiFi y el bluetooth. Polo tanto, a los visitantes brínden-yos la oportunidá d’interactuar cola contorna usando los sos propios recursos.
Feather Tales II ye ún de los trés trabayos escoyíos na convocatoria “Oficina de Proyectos”, realizada por LLABoral, qu’incluyía la producción de dos propuestes d’artistes asturianos o residentes n’Asturies y otra, empobinada a creadores de cualquier nacionalidá interesaos en facer una residencia artística de dos meses de duración nel Centru. LLABoral yá mostró les otres dos obres seleccionaes pa la so producción: Hitos, ya nadie muere en casa, d’Eduardo Guerra, y Danza infinita. Homenaje a Henrietta Lacks, de Lorena Lozano.