Proyectu resultáu de la residencia de Rodrigo García nel LLABoratoriu de Soníu
Una serie de cascos de moto interveníos válen-y de vehículu narrativu a Rodrigo García pa una pieza onde, como’l mesmu nome indica, y como ye lo avezao nel so trabayu, lo autobiográfico val-y de modelu al autor pa esplorar dellos aspectos de la nuestra condición humana.
El dramaturgu y director escénicu hispano-arxentín Rodrigo García desenvolvió a lo llargo de la residencia en LLABoral una instalación sonora que lleva de títulu Estudio incompleto acerca de mi propia claustrofobia que empezó de repente una noche a mis 41 años en una furgoneta en la ciudad de Seúl.
La instalación presenta siete ambientes sonoros reactivos que, en respuesta a la respiración y los soníos producíos cuando’l propiu usuariu pon un cascu, xeneren una historia y unes testures sonores que van apaeciendo y desapaeciendo. Caún de los cascos implica una configuración y una esperiencia d’escucha particular xenerada al traviés d’una serie d’altavoces y tresductores de superficie. Les técniques usaes en cada casu suponen, en conxuntu, una recopilación de les munches maneres contemporánees de trabayar col soníu, dende la simulación binaural a la síntesis granular, pasando per grabaciones de campu o, tamién, per dellos modelos d’análisis d’audiu englobaes dientro del llamáu machine listening.
“El cascu de moto ye un oxetu que tampoco nun me resulta nada simpáticu y quiciabes por eso lu escoyí como’l micro-espaciu afayadizu pa meter nél la pieza o les pieces sonores; cascos de moto que suenen, cada cascu cola so historia, cola so obsesión, con un soníu que, según quien lu reciba, va poder acabar siendo un tormentu, un xuegu o un cuentu pa dormir. El públicu o receptor fai les obres siempre».
«Soi un artista de teatru, de segundes, diz Rodrigo García. Enantes soi un escritor. Supongo qu’esta instalación dexa ver d’ónde vengo, porque estos elementos nel espaciu aseméyense a una escenografía teatral y establezse un diálogu de sordos, un sistema d’incomunicación”.