Muestra de los proyectos ganadores del 1.er Premiu LLAB<20
Doce propuestes conformen la Esposición LLAB<20, que recueye los proyectos premiaos y les menciones honorífiques de la I Convocatoria del Premiu LLAB<20. Trátase d’un gallardón creáu por LLABoral Centru d’Arte que quier da-y visibilidá y compartir cola sociedá’l potencial técnicu y creativu de los nativos dixitales asturianos de menos de venti años.
La esposición muestra les propuestes más destacaes, feches por alumnos y alumnes de colexos y institutos de dellos puntos de la xeografía asturiana, como Castrillón, Xixón, Mieres, Uviéu y Santuyano, amás d’otros mozos y moces que se presentaron de manera individual a la convocatoria.
Toes elles reflexen el potencial y habilidaes, en disciplines y temes tan variaos como la creación audiovisual y sonora, la robótica, la programación creativa, el diseñu y la fabricación dixital, o les redes sociales.
La muestra recueye trabayos tan variaos como una maqueta d’un parking fechu con un sistema interactivu de señalización dixital, un ascensor fechu por impresión 3D; una aplicación móvil de viaxes; curtiumetraxes; un llibru-oxetu dixital; stop motions comprometíos social y culturalmente o una instalación que nos va facer reflexonar sobre’l papel de la economía y la tecnoloxía dixital nuna persona con discapacidá auditiva.
La esposición tamién quier poner en valor les iniciatives impulsaes pol profesoráu de colexos y institutos, que fomenten de manera orixinal y comprometida la preparación del so alumnáu pal mundu dixital, que va implicar retos bien estremaos de lo que caracterizó la era industrial.
Elles y ellos son los protagonistes d’una xeneración nueva qu’encara retos y cambeos derivaos de los avances científicos y tecnolóxicos de la sociedá actual.
Dende LLABoral queremos llamar l’atención alredor d’esta mocedá, y promover un usu críticu y creativu d’una tecnoloxía que forma, cada vez más, parte fundamental de les nuestres vides y trabayu, y a partir de la qu’esperimentamos otres maneres de percibir, concebir y rellacionanos col mundu que nos arrodia.
Pa la realización de la esposición del Premiu LLAB<20, LLABoral Centru d’Arte y Creación Industrial cunta cola collaboración de la Fundación Banco Sabadell, comprometida cola educación y la sociedá dixital.