Arte contra la violencia machista
La esposición Equivocada no es mi nombre preséntase como un proyectu espositivu averáu a feches tan destacaes como’l 23 de setiembre, Día Internacional contra la Esplotación Sexual y la Trata de Persones, y del 25 de payares, Día Internacional de la Eliminación de la Violencia pa cola Muyer, una fecha nacida dende’l movimientu feminista pa conmemorar l’asesinatu de les trés hermanes Mirabal na República Dominicana en 1960.
L’Asamblea Xeneral de la ONU, en 1999, fíxose cola reivindicación, estableciendo la fecha como fitu pal glayíu común contra una violencia que supón la causa principal de muerte y incapacidá ente les muyeres. Los datos son alarmantes: una de cada tres muyeres sufrieron violencia física o sexual; a cuasi 750 millones de muyeres y neñes en tol mundu les casaron primero de cumplir 18 años; el 71 % de les víctimes de trata son muyeres y neñes, y trés de cada cuatro son usaes pa la esplotación sexual.
Equivocada no es mi nombre presenta un percorríu peles obres d’artistes de trayectoria nacional y internacional que trabayaron denunciando estes violencies dende’l llinguaxe visual, como’l videu, la instalación o la performance…
Partiendo de les artes como ferramienta tresformadora de la realidá, esta esposición propón estes obres como una reflexón sobre la creación artística y l’activismu feminista, dalgo común a toles presentes, y propón debates nuevos sobre les múltiples manifestaciones de la violencia pa coles muyeres. Toles participantes son artistes, como nun podía ser d’otra manera, comprometíes con una realidá que, como señala António Guterres, secretariu xeneral de la ONU, «hasta que les muyeres y les neñes, que constituyen la metá de la humanidá, vivan ensin mieu, ensin violencia y ensin inseguranza diaria, nun vamos poder afirmar realmente que vivimos nun mundu xustu y equitativu».
Nun tán toes, diba ser imposible abarcar tol corpus de trabayos que cientos d’artistes lleven faciendo décades pa denunciar la violencia pa coles muyeres. Buscóse presentar, nesta esposición, un percorríu ampliu per dalgunes de les munches víes peles que’l patriarcáu agrede a les muyeres namás pol fechu de selo. Nosotres siguimos enfrentándonos al asediu, a la violencia, a les amenaces, a silencios cómplices, a que nun nos crean cuando denunciamos agresiones, a que se cuestione la nuestra palabra…, pero tamién siguimos respondiendo ensin dar un pasu p’atrás. El sistema artísticu nun foi menos, con grandes artistes que quixeron usar la so ferramienta d’espresión, la so obra, como sitiu de denuncia, de concienciación, de respuesta a una violencia constante.
Como señala la filósofa Amelia Valcárcel, “una cadena ye lo fuerte que seya l’esllabón más débil”, apuntando a que “la llibertá de les muyeres nun ta planetariamente consiguida”. Nacer muyer güei, en munchos sitios, sigue suponiendo encarar una realidá que, nos meyores casos, implica una desigualdá salarial frente a los compañeros homes, y nel peor, violaciones, matrimonios forciaos, mutilación xenital…
L’arte y la cultura son espacios de reflexón, de pensamientu compartíu, de facer preguntes, de cuestionamientu del statu quo. El sistema del arte nun ye ayenu a les problemátiques qu’afecten a les sociedaes y asina lo demostró a lo llargo de los sieglos, con artistes y obres qu’intentaron proponer puntos de vista nuevos énte los conflictos humanos. L’arte que quiera ser políticu y busque tresformar de verdá estes realidaes inxustes tien que ser, naturalmente, feminista, porque namás aquella propuesta que seya de verdá democrática va ser, en consecuencia, igualitaria.