Una serie documental de Luis Argeo y Ramón Lluís Bande.
(ende) ye un proyectu audiovisual documental que naz d’un viaxe, d’un mapa de carreteres. Al empar, (ende) orixina mapes nuevos, viaxes nuevos.
(ende) ta integráu por una colección de retratos cinematográficos de persones diferentes –escoyíes al azar nel trescursu del viaxe- que viven en zones que de dalguna manera representen una llende, marquen una frontera. Asina, (ende) presenta una serie de reflexones sobre’l conceptu de territoriu y les tresformaciones culturales y sociales que nél s’aprecien al traviés de desplazamientos curtios. (ende) pecuerre la distancia que separa’l “espaciu físicu” del “paisaxe”, dotando al mapa vieyu d’imaxe y soníu, trayéndonos dende los determinos del territoriu una güeyada que rexistra les vivencies d’aquelles persones que lu habiten. Como escribió Baudelaire: «El retratu ye una biografía dramatizada o más bien el drama inherente a tou ser humanu. Nada ye indiferente nel retratu, el xestu, l’apariencia, la decoración val pa representar un calter… L’artista primero ve aquello que se fai ver, pero tamién aquello que se caltuvo escondío». A partir d’esta colección de biografíes dramatizaes, (ende) propón, al traviés de los recursos espresivos del cine espandíu, la invitación a un viaxe, físicu, conceptual y emocional, que nun dexa de presentar les cuestiones esenciales sobre lo que somos.