Una instalación sonora xenerativa, proyectu ganador de la convocatoria LLABoral-Lo Pati
Paisajes Imposibles ye una instalación sonora xenerativa que quier mostrar un paisaxe inventáu a partir de grabaciones de campu o paisaxes sonoros de dellos sitios y xeografíes. La instalación muestra un paisaxe sonoru recreáu que vien determináu por un reló formáu a partir de toques de campana de dellos sitios. El sistema informáticu qu’activa esti paisaxe sonoru inventáu ye un dispositivu aleatoriu qu’escala los cambeos producíos nun periodu de 24 hores en dos hores de duración. Los fusos horarios vienen determinaos por un reló creáu a partir de dellos toques de campana de dellos pueblos.
Edu Comelles foi ganador de la convocatoria d’una residencia artística compartida, llanzada por LLABoral y Lo Pati–Centre d’Art de les Terres de l’Ebre, enfocada a proyectos de música esperimental y arte sonoru rellacionaos col paisaxe sonoru d’Asturies y del Delta de l’Ebre.
L’artista sonoru desenvolvió esta instalación a partir del trabayu fechu nel Centru d’Arte y Creación Industrial de Xixón y n’Amposta, onde tien la sede Lo Pati.
Paisajes Imposibles ye un collage sonoru, una recreación d’un paisaxe imaxinariu creáu a partir de retayos d’otres realidaes ayenes cola voluntá d’esplorar víes creatives nueves y formatos nuevos de muestra del paisaxe sonoru. La obra incluye soníos recoyíos sobre’l terrén en dos territorios separaos, Asturies y el Delta del Ebro, y otros yá grabaos previamente pa cartografíes existentes en caúna d’eses rexones, dando pie a “una ficción creada a partir de retayos de realidá”.