Conexones emerxentes ente biosfera y tecnoesfera
Eco-visionarios presenta doce posiciones artístiques d’ámbitu nacional y internacional qu’esploren les conexones nueves ente la biosfera y la tecnoesfera, esta última marcada pola presencia imperiosa del ser humanu nun planeta de recursos limitaos.
Son precisamente estes rellaciones les que la esposición pon a debate, al traviés d’una selección de propuestes estétiques y conceptuales, narratives utópiques y contra-modelos ecosistémicos pa compartir con un públicu bien amplio, tamién al traviés d’un programa educativu y de mediación a lo llargo de cinco meses.
La esposición ye un proyectu espositivu internacional, organizáu a comuña pol Bildmuseet d’Umeå (Suecia), House of Electronic Arts (HeK) de Basilea (Suíza), MAAT- Muséu d’Arte y Arquitectura de Lisboa (Portugal) y LLABoral Centru d’Arte y Creación Industrial de Xixón. Concebíu como un work in progress, a esti proyectu sumáronse tamién con contribuciones nueves Matadero Madrid y la Royal Academy of Arts de Londres (Inglaterra) pa facese ecu de los retos medioambientales nuevos trataos dende les práctiques artístiques contemporánees más tresversales.
La singularidá del proyectu radica en que, a lo llargo de dos años, caúna de les entidaes participantes fixo una esposición que trata sobre los vínculos del arte contemporaneu colos desafíos medioambientales actuales, dende enfoques distintos, rellacionaos directamente coles llinies de trabayu de la institución.
Bildmuseet presentó esti tema dende una revisión histórica de la conexón ente arte y ecoloxía. MAAT focalizó la esposición na rellación tresdisciplinar ente arte, diseñu y arquitectura sostenible, y HeK afondó nos nexos ente arte, ecoloxía y tecnoloxía.
Nesta última fase, LLABoral Centru d’Arte y Creación Industrial va afondar dende perspectives variaes nes conexones emerxentesente la biosfera y la tecnosfera, teniendo en cuenta obres de calter tresdisciplinar que basculen ente arte, ciencia, tecnoloxía y sociedá. Paralelamente, la esposición Eco-visionarios en Matadero Madrid (13.06.-06.10.2019) amplíase con un programa d’investigación y desenvolvimientu impulsáu pol Institutu Mutante pa Narratives Ambientales (IMNA).
Los resultaos de les distintes esposiciones alredor del Eco-visionarios muéstrense nun catálogu editáu n’inglés pola editorial Hatje Cantz que, amás de los ensayos de les comisaries, cunta con contribuciones d’espertos en delles disciplines como Linda Weintraub, Amale Andraos, Matthew Fuller y T.J. Demos. (www.hatjecantz.de).
Na inauguración vamos poder disfrutar de «Fractura», de OKKRE (Uge Pañeda), un mix inspiráu nes emociones que la exa de la esposición xenera na artista pasando per estaos de rabia o señardá. La pieza, con duración d’una hora aproximao, va componese de delles grabaciones de campu feches a lo llargo de los últimos años por ella mesma, amás d’una selección d’estractos musicales de dellos artistes con munchu poder evocador y atmosféricu.