Proyectu ganador de la Beca de producción DKV Seguros – Álvarez Margaride
Prótesis discursiva (Una conversación alquímica) supón un intentu de cuestionar la rellación difícil ente investigación científica y procesos de toma de determinos políticos, nun momentu onde resulta imposible siguir inorando l’impactu que’l xéneru humanu tuvo sobre’l planeta a lo llargo del últimu sieglu, no que nun va muncho se llamó l’Antropocenu (una dómina xeolóxica marcada por tresformaciones fondes na Tierra producíes por acción antropoxénica).
El proyectu compónse d’una instalación audiovisual –una proyección mural de grandes dimensiones y soníu cuadrafónicu– y una pieza d’animación dixital pa monitor.
Cola reforma de la llei enerxética n’España como telón de fondu, l’artista realiza una serie d’entrevistes a un grupu heteroxéneu de persones (un activista ecoloxista, un abogáu, un economista, un xeólogu, un meteorólogu, una doctora especializada en salú y contaminación ambiental, un catedráticu d’Ecoloxía y especialista n’Oceanografía y Cambéu Climáticu y una filósofa de la ciencia). Fragmentos d’estes grabaciones reprodúcense dende cuatro altavoces de calter escultóricu, onde la forma remite a los símbolos alquímicos de los cuatro elementos de la naturaleza. Esta referencia tien la so correspondencia na base sonora reproducida dende caún d’estos altavoces –compuestes pol músicu Nigel Yang– y na proyección mural onde una colección d’oxetos d’usu cotidianu exhíbense xunto a utensilios provinientes de dellos momentos históricos y civilizaciones, colos que se podía dicir que comparten xenealoxía. Colección tala evidencia l’encaxe ente los elementos naturales y la so domesticación tecnolóxica como ún de los rasgos definitorios de la cultura humana a lo llargo del pasu del tiempu, cuestionando la percepción de naturaleza y cultura como realidaes estanques.
La pieza pa monitor Amanecer ponnos énte un personaxe animáu dixitalmente –de rasgos familiares– que recita n’orde cronolóxicu una llista d’avances tecnolóxicos relevantes pal desenvolvimientu humanu. De la que la frecuencia de les palabres aumenta, el software d’animación atópase con dificultaes pa sincronizar el movimientu de los llabios del personaxe al soníu d’estes.
La esposición garra’l títulu d’una noción que’l filósofu, sociólogu y historiador de la ciencia Bruno Latour usa pa referise a los procesos y infraestructures al traviés de les que los investigadores científicos son quién a “dar voz” a los elementos non humanos que, a pesar de formar parte fundamental de la nuestra existencia, escarecen de llinguaxe.
Prótesis discursiva ye’l proyectu ganador de la II Beca de Producción DKV Seguros – Álvarez Margaride y foi producida en Plataforma 0 Centru de Producción de LLABoral.