Paisaxes nuevos na dómina tecnolóxica
Les dos últimes décades vieron surdir un mundu globalizáu y híper-conectáu, nel que les noticies y la información se suministren en tiempu real onde y cuando seya y el fluxu de datos de contino modifica la nuestra percepción del mundu. Va dalgunos años, el términu «realidá aumentada» acuñóse pa describir un ámbitu onde una capa nueva d’información alteria la percepción que tenemos de la realidá y el fluxu d’información conviértese nuna parte integral de la nuestra esperiencia física del mundu. Ciertamente, de la qu’un númberu mayor de ferramientes entren na nuestra vida de caldía, y interfaces cada vez más complexos dexen mapiar el territoriu y/o yustaponelu a la so interpretación –podemos pensar por exemplu nos mapes GPS que señalen hoteles, restaurantes, estaciones de serviciu o tiendes nel trayectu-, inclinámonos a comprender el paisaxe non solo al traviés de lo que vemos, sinón tamién de lo que sabemos. La visión ta distorsionada o reconfigurada.
Los pintores fixeron del paisaxe’l so tema a lo llargo de sieglos en representaciones realistes o contornes imaxinaes, o usáronlu como telón de fondu de retratos. Los artistes que participen nesta esposición perpetuen esa tradición de representar la nuestra cortornada, yá seya real o fantasiada, anque tamién reflexonen sobre la mezcla enrevesada de la información visual y cómo l’aumentu nel algame de datos modificó’l nuestru mundu. Caún garra un enfoque diferente y revela dellos aspectos de los cambeos trayíos al paisaxe de la tecnoloxía. Ye significativo que’l xaponés se refiera a la «naturaleza» como’l conxuntu d’elementos que componen el paisaxe de la nuestra vida cotidiana: pue concebise’l paisaxe como’l contestu onde vivimos y interactuamos con otros, reconsiderando lo que ye la naturaleza y lo que ye información. Esta realidá aumentada ye la que vivimos…, un paisaxe nuevu: un datascape.
La esposición Datascape, que se presentó pela primer vez en Borusan Contemporary na primavera del 2013, muestra un panorama de la creación de los últimos diez años, con delles producciones específiques y delles actualizaciones d’obres que, en conxuntu, atestigüen una reflexón de contino sobre esti xéneru al que les tecnoloxíes nueves s’incorporen como llinguaxe.