Afortunadamente, caldía sal el sol
El proyectu Generadores de sombras consiste na creación d’un set de rodaxe, dientro de la sala d’esposiciones, cola mira de facer una pieza de videu en vivo, un planu secuencia en directo. Darréu, depués del pase de visuales, esti escenariu permanez nel espaciu. Ye importante pa l’artista que’l públicu se sienta parte de la obra, qu’ocupe’l so sitiu física y conceptualmente, que les coses pasen alredor. Un espectáculu en directo nun diba ser nada ensin públicu.
Empieza a ser recurrente nel trabayu de Cristina Busto la idea del viaxe como movimientu, el movimientu como llibertá. Les imáxenes del viaxe, los paisaxes que pasen énte los nuestros güeyos, les llectures, los pensamientos, la lluz que cambia de siguío, que recorta los árboles sobre’l cielu y convierte n’espeyos los cristales.
Anguaño, Cristina Busto trabaya col videu en vivo, al qu’incorpora solombres (ente otres técniques) como proyección directa. Sicasí, siempre s’entrugó: ¿Qué sentíu tien la vida? Les respuestes son infinites, desque nun tien nengún sentíu hasta que somos xeneradores de solombres. A nun ser que nun haya lluz, afortunadamente’l sol sal caldía.