Conquistando l’espaciu domésticu
La casa nun ye namás un espaciu físicu, sinón el sitiu qu’agospia tol armazón conceptual asociáu a la crianza, la familia y la distribución de funciones por razón de xéneru. Ensin dulda dalguna ye nesti espaciu onde les diferencies biolóxiques se van configurando como desigualdaes polítiques y onde la muyer queda definida pola so condición de madre, esposa y ama de casa.
Asina entendío, la casa dificulta, cuando non imposibilita, la superación de lo doméstico, entorga’l devenir hasta cualquier otru proyectu que trescienda los ritmos y hábitos del mesmu. Pero ¿y qué pasaría si la nuestra casa dexare de ser cautiveriu pa convertise en refuxu? ¿Qué pasaría si los murios de los nuestros espacios domésticos foren permeables a los nuestros proyectos personales? ¿Qué pasaría si la casa fore tamién el nuestru taller, l’espaciu propiu pal nuestru tiempu y proyectos propios?
Casa tomada ye la respuesta del Colectivo Offmothers a estos interrogantes. Pero si bien nel rellatu de Cortázar del mesmu títulu los moradores abandonen la casa énte fuercies que distorsionen el so orde vital, na Casa tomada d’Offmothers distorsiónase l’orde pa insistir nél y esplorar una redefinición nueva de casa.
El proyectu produzse en LLABoral Centru d’Arte y Creación Industrial al traviés d’una residencia de producción de la Convocatoria Residencies Artístiques 2017.