Proyectu ganador del Premiu LLABjoven_Los Bragales, convocáu en conxuntu pola Colección Los Bragales, propiedá del empresariu cántabru Jaime Sordo, y LLABoral
Menhir Instalación 0 ye una esploración del paisaxe d’Asturies y Llión al traviés d’una instalación-instrumentu interactiva. La obra busca la cohesión táctil de la música imaxinada superpuesta al paisaxe; onde pasa la presencia de lo corporal, lo colectivo y lo ritual. Ye un procesu de rellación col monte, qu’afonda nel movimientu internu que se siente al percorrelu.
La obra presenta’l paisaxe como una partitura, abriendo la esperiencia a un espectador que se convierte nel intérprete de la pieza. Na sala, les piedres de carbón espándense pa formar una contorna que se pue percorrer y tocar. Estos fragmentos valen de controladores de soníu de manera tala que, al tocalos, l’espectador-intérprete compón, in situ, un espaciu sonoru.
El carbón funciona equí como un conductor doble. Per un llau, lleva la carga eléctrica de la persona a una placa d’Arduino, que recibe la señal y llanza’l soníu. Per otru, conecta’l paisaxe colos aspectos sociales, económicos y ecolóxicos que lu construyen. El videu que completa la instalación muéstranos un monte qu’amplía la visión acullá de les parés de la sala, abriendo l’espaciu a l’allucinación visual y sonora que produz el paisaxe.