Muestra de los proyectos premiaos na XXVIII edición d’esta convocatoria promovida pola Comunidá de Madrid
Circuitos de Artes Plásticas 2017 ye un proyectu espositivu onde se muestren los trabayos de los artistes seleccionaos na edición 2017 de la convocatoria pública que concede ayudes a la producción d’obra a diez artistes menores de 35 años residentes en Madrid y qu’entama la Comunidá de Madrid en collaboración col Principáu d’Asturies y LLABoral Centru d’Arte.
Nesta XXVIII edición, comisariada por Carlos Delgado Mayordomo, ufiértase un panorama mui completu de la variedá de práctiques artístiques actuales dende posicionamientos estéticos y conceptuales diversos.
Trátase d’una muestra qu’apunta pa horizontes formales y estéticos mui heteroxéneos, al traviés d’un garapiellu d’obres con un carácter críticu bien marcáu.
Toos ellos reflexonen, al traviés de la so obra, sobre problemes sociales y culturales variaos vinculaos a ámbitos tan complexos como’l xéneru, la memoria y el territoriu. A pesar de la diversidá de propuestes formales y conceptuales, estos diez artistes presenten una partida de rasgos comunes, ente los que destaquen el marcu xeneracional y el deséu d’espander les artes visuales a otros campos sociales, amás d’una biografía marcada pola movilidá continua dientro y fuera d’España.
La escoyeta d’estos artistes fíxola un xuráu formáu por representantes de prestixu reconocíu en dellos sectores de les artes visuales, incluyíu Carlos Delgado, quien llevó a cabu, amás del comisariáu, el diseñu y la xestión de les actividaes que se van facer por cuenta de la muestra, que son una vía añadida pa promocionar la obra de los artistes y favorecer el so accesu a la vida profesional.
Como na edición anterior, gracies a un alcuerdu de la Comunidá de Madrid y el Principáu d’Asturies, el xuráu otorgó-y a una de les artistes, nesti casu Marián Garrido, una beca de residencia de producción en LLABoral.
La obra producida con esta beca va formar parte de la esposición de Circuitos d’Artes Plástiques 2017. De manera simultánea a la esposición en LLABoral Centru d’Arte de Xixón, va presentase na Sala Borrón, d’Uviéu, una selección de trabayos de los mesmos diez artistes, siempre vinculaos a les obres presentaes na Sala d’Arte Mozu de la Comunidá de Madrid.