Catedral de la lluvia ye una instalación sonora sobre la obra de construcción del depósitu d’agua de tormenta del parque Hermanos Castro de Xixón y la so puesta en marcha posterior. Los depósitos de tormenta son arquitectures soterrañes escomanaes que tienen la mira de retener l’agua de llover cuando hai precipitaciones mui intenses. Minimicen el riesgu de llenes y eviten que los primeros regueros d’agua pluvial, que ye lo más contaminao, se vierta directamente a ríos o regatos.
La pieza presenta una composición sonora de 2 hores y 30 minutos de duración que da a conocer el depósitu d’agua de tormenta del parque de los Hermanos Castro de Xixón al traviés de los sos soníos y de los ecos de la buelga sonora que foi dexando nel sitiu al construyilu. Les grabaciones rexistren dende los primeros soníos de la construcción del depósitu en xunu del 2020 hasta los de la entrada en funcionamientu por cuenta de lo muncho que llovió sobre Xixón en payares del 2021, pasando pelos producíos nos trabayos necesarios pa cimentar una infraestructura d’estes característiques. La composición compleméntase con semeyes y planos arquitectónicos qu’acompañen sutilmente al soníu.
Catedral de la lluvia pon en valor el patrimoniu industrial davezu infravaloráu, y ye un homenaxe, dende’l campu del arte sonoru, a una arquitectura soterraña fundamental pal saniamientu de les ciudaes y la preservación de la biodiversidá nel nuestru medioambiente, qu’agora faise visible y audible pa la ciudadanía.