Barricadas en el hielo: reproponer la industria, recuperar el planeta ye una investigación d’Oliver Ressler sobre’l movimientu global pola xusticia climática.
Barricadas en el hielo: reproponer la industria, recuperar el planeta ye una esposición sobre’l calentamientu global, el movimientu pola xusticia climática y la rellación d’esti últimu coles artes.
De la primer COP (Conferencia de les Naciones Uníes sobre’l cambéu climáticu) n’Alemaña en 1995, a la última esti añu n’Exiptu pasaron 27 años nos que les emisiones globales de carbonu nun menguaron nada. En consecuencia, la temperatura global sigue xubiendo. Esta inacción de los estaos nacionales llevó a les persones a actuar por elles mesmes, ensin representación. En tol mundu surdieron movimientos pol clima organizaos horizontalmente. Estos movimientos d’acción colectiva llevaron a cabu bloqueos de les industries d’estracción de combustibles fósiles y les rutes de tresporte, organizaron movilizaciones contra la espansión d’aeropuertos, fixeron campañes exitoses de desinversión y pararon la perforación nel Árticu. O, como viemos hai mui poco, llevaron a cabu acciones de protesta frente a obres d’arte nos museos más importantes d’Europa.
El títulu Barricadas en el hielo fai referencia a la escala de la emerxencia qu’encara’l movimientu pola xusticia climática y l’algame de lo que se propón facer. Bloquiar les capes de xelu mentes se dilen ye físicamente imposible, pero’l movimientu ta intentando dalgo históricamente ensin precedentes: parar l’amenaza más absoluta a la que s’enfrentó’l planeta na historia humana rexistrada. Cuando’l xelu del Árticu se dile, el nivel del mar xube per toes partes; les isles y les ciudaes añáguense y funden, l’agricultura y la pesca tarramiellen y la vida humana vese comprometida.
La esposición Barricadas en el hielo presenta películes, trabayos fotográficos y instalaciones frutu d’una década d’investigación del artista y cineasta Oliver Ressler rexistrando y documentando movilizaciones, actividaes, asamblees y reuniones de trabayu exemplares de los movimientos pol clima en tol mundu.