Auto. Sueño y materia ye un proyectu espositivu ampliu y complexu qu’axunta más d’un centenar d’obres de 60 artistes. La esposición analiza la presencia del automóvil nel arte contemporaneu, o d’una manera más precisa, la rellación ente la cultura del coche y la creación artística del nuestru tiempu. El papel central qu’ocupó l’automóvil como elementu fundamental de la cultura del sieglu XX y como símbolu de la sociedá de consumu, dexa presentar el binomiu arte-coche dende un contestu que desborda l’ámbitu estéticu pa espardese a consideraciones sociales, polítiques y antropolóxiques. Ye precisamente nestos momentos nos qu’asistimos a la emerxencia d’un sentimientu de clausura o de fin d’un periodu de la cultura material desenvueltu a lo llargo del sieglu XX, del que l’esponente máximu ye’l coche, cuando se fai necesario y útil desplegar una mirada retrospectiva sobre esti iconu tresformador de los vezos, el territoriu y la industria.
El potencial simbólicu fuerte del automóvil, capaz a exemplificar, sintetizar o vehicular discursos complexos sobre la realidá de cada momentu, sigue espertando güei l’interés de bien d’artistes inclusive con énfasis mayor qu’en décades anteriores. Ye nesi interés y nos sos resultaos a lo llargo de los últimos años onde se configura’l conteníu d’esta esposición. Cuasi toles obres presentaes correspuenden a les dos últimes décades, pero con un acentu fuerte nel momentu actual. Un periodu a lo llargo del que la llectura del coche dende’l campu artísticu foi garrando tanta densidá y complexidá como perspectiva crítica y acidez alloñada. L’automóvil foi a lo llargo del sieglu XX ún de los medios más eficaces d’encarnación material de los suaños; agora, dende la encruciyada d’un cambéu de sieglu, los artistes entrúguense sobre la realidá d’esos suaños.
Les obres que se presenten encaren dende formulaciones perdiverses la simboloxía, les actitúes, les tresformaciones y les consecuencies de la cultura del automóvil, pero fáenlo asumiendo la so condición esencial metafórica sobre l’home y la sociedá contemporánea. Oxetos, situaciones, comportamientos y procesos rellacionaos col usu del coche, cola so fabricación o cola so identidá, son subvertíos, sometíos a análisis, sintetizaos o recreaos, construyéndose d’esta manera una distancia crítica que dexa repensar la historia y los usos del automóvil dende la so condición actual, pero tamién como parte d’una etapa tecnolóxica y productiva cuasimente zarrada. El repertoriu d’actitúes, vezos, modelos y iconos ye estensu. La velocidá, la potencia, el poder, la sexualidá, el deséu, la “humanización” del automóvil, les consecuencies medioambientales, el gastu enerxéticu, la tresformación del espaciu social, l’alcuentru ente movimientu y inmovilidá, la utopía de los prototipos y los “concept cars”, la esencia del motor, l’accidente, la muerte, el viaxe, la tresformación del turismu, la domesticidá del coche, la mutabilidá de la rellación home-máquina, les rotondes y los aparcamientos, les aglomeraciones y los atascos, la simboloxía de les marques, la tensión ente funcionalidá y seducción, primitivismu y ilusión.
Nel contestu de LLABoral esta esposición surde como una reflexón necesaria sobre la tecnoloxía y el progresu y sobre les sos condiciones. Una mirada crítica dende l’arte qu’analiza ún de los iconos principales del sieglu XX: l’automóvil como metáfora del home y los sos suaños.