Muestra de proyectos de la Convocatoria de Residencies Artístiques 2021
Los proyectos que se presenten nesta esposición formen parte del programa de Residencies Artístiques 2021 qu’acoyó a más de 40 artistes asturianos/es o residentes n’Asturies.
Ensin ser esta una esposición con un rellatu comisarial qu’entrellacie les obres, toes comparten un interés por ufrir una mirada crítica al presente, por investigar sobre cuestiones contemporánees al traviés de la práctica artística.
Los y les artistes participantes faen por responder a inquietúes alredor de la sobreesposición a les imáxenes del mundu actual, la so rellación cola realidá y la idea de verdá, la necesidá d’una vuelta al asosiegu y reposu de la infancia, el conocimientu del mundu esterior dende les esperiencies familiares, la recuperación de xenealoxía feminista al traviés de la vida de dos muyeres asturianes o les posibilidaes plástiques del cuerpu humanu y el xéneru.
Esti averamientu pequeñín a la producción contemporánea d’artistes del contestu asturianu muestra trabayos que parten de la observación y esperiencies nel so entornu más averáu, pero con voluntá y calidá pa trespasar les fronteres del so territoriu d’orixe.