Un proyectu d’investigación sobre’l paisaxe cultural de les Cuenques Mineres asturianes
El proyectu d’investigación Aprendiendo de las Cuencas tien como oxetivu ufiertar una mirada nueva del paisaxe cultural de les Cuenques Mineres centrales d’Asturies. Pa eso, asítiase en correspondencia con dellos de los manifiestos arquitectónicos más importantes de les últimes décades, surdíos como resultáu d’análisis afortunaos vertíos sobre sitios antaño subestimaos. Les interpretaciones que Reyner Banham, Robert Venturi y Denise Scott Brown, Rem Koolhaas y l’Atelier Bow-Wow fixeron sobre Los Angeles, Las Vegas, Nueva York y Tokio, respectivamente, constituyen referentes indispensables pal so desenvolvimientu.
Igual qu’estes ciudaes, les Cuenques viéronse alteriaes sensiblemente nun periodu de tiempu curtiu. Sometíes a un procesu fuerte d’industrialización, pasaron, en poques décades, de ser unos valles naturales d’estructures económiques y sociales fundamentalmente rurales a incorporar dientro d’elles aglomeraciones urbanes puxantes de densidá inesperada. Si bien nun pueden competir n’importancia colos exemplos anteriores, la so configuración urbana tan herética tamién ye consecuencia del impactu, nun espaciu concretu y nun periodu de tiempu relativamente curtiu, d’intereses económicos. En consecuencia, la coexistencia de los paisaxes natural, rural, industrial y urbanu nun se produz nelles d’una manera regulada o planificada. Los límites ente unos y otros tán definíos vagamente, lo que nun dexa precisar les sos árees d’influyencia. En conxuntu, les Cuenques percíbense como un magma d’identidaes contrapuestes pero entemecíes. Esto facilitó l’apaición dientro d’elles de modelos edificatorios fondamente heterodoxos que lleven inscritu nel so códigu xenéticu’l conflictu sobre’l que se llevanten. Trátase d’arquitectures híbrides, artefactos mutantes, que, a pesar de la invisibilidá que-yos da la condición marxinal inevitable, anguaño son quién a ufiertar llecciones arquitectóniques perinteresantes.
Con esti estudiu quieren ensayase árees d’oportunidá nueves nel pensamientu arquitectónicu contemporaneu y reconvertir la imaxe convencional que se tien de les Cuenques, un sitiu refugáu tradicionalmente pero que, examináu con güeyos desprexuiciaos, conforma una contorna única na estructura urbana europea.
Na Sala d’Esposiciones Sabadell Herrero, Artefactos de la memoria ufierten una muestra representativa del llabor de documentación y catalogación fechu a lo llargo del procesu investigador. El so conteníu desenvuélvese a partir del análisis de 40 de los artefactos más singulares identificaos nesti territoriu. En LLABoral Centru d’Arte y Creación Industrial la reflexón espárdese a manera d’especulación onírica a partir de los conteníos ellaboraos na investigación al traviés de trés apartaos: espectros, proyecciones y ensoñaciones.
Pa la inauguración Fasenuova va ufiertar un conciertu a los asistentes.