Andrée-Anne Roussel. Afinando

15 ochobre 2015 – 10 xineru 2016

Un proyectu desenvueltu pola artista canadiense Andrée-Anne Roussel a lo llargo de la so residencia nel LLABoratoriu de Soníu, nel marcu del alcuerdu firmáu ente LLABoral y Avatar

Silenciu. Depués un instrumentu d’una orquesta empieza a emitir soníos. Darréu siguen dellos más. Pronto, tolos instrumentos ensayen dalgunes melodíes. Surde un soníu que ye al tiempu caótico y melódico. El soníu avérase silenciosamente a los instrumentos. Oyemos la fricción suave del arcu sobre les cuerdes y de los deos de los músicos eslizándose sobre elles, pero tamién el cruxir de sielles, la respiración, el rozar de la ropa.

Trátase d’Afinando (Warm-Up), una instalación sonora inmersiva que se centra nel soníu caótico qu’emite una orquesta cuando los músicos se concentren p’afinar los instrumentos.

Afinando introduz al públicu nel espaciu íntimu qu’existe ente’l músicu y el so instrumentu. Gracies a esta proximidá, la instalación vuélvese más sensorial, quier dicise, quier algamar non solo l’oyíu de quien escucha, sinón tamién el so sentíu del tactu. Entós óyese un La y tolos instrumentos s’afinen. Al final del bucle, toos tán nel mesmu tonu. Anque esti soníu ye común a toles orquestes, nunca ye’l mesmu.

Con esta instalación Andrée-Anne Roussel quier llamar l’atención de los oyentes sobre esti soníu que, anque podría percibise como un soníu vulgar (non musical), tien una gran harmonía y, al so paecer, ye perconmovedor. Representa tamién el primer contactu del públicu cola orquesta enantes d’un conciertu. Un soníu que nos sorpriende, prepara’l nuestru oyíu pa lo que vien y descubre l’acústica de la sala. Interesase por esi soníu ye tamién interesase pola resonancia y el timbre de los instrumentos, más que pola partitura qu’interpreten o les melodíes que salen d’éstos.

Afinando ye un proyectu desenvueltu pola artista canadiense Andrée-Anne Roussel mentes fixo la so residencia nel LLABoratoriu de Soníu, nel marcu del alcuerdu firmáu ente LLABoral y Avatar, centru de Quebec (Canadá) especializáu nel arte sonoru y electrónicu.