Cuando una corporación multinacional nun quier dialogar col veceru, crea un llaberintu
Dédalo España d’Adrián Cuervo ye un proyectu espositivu nel que s’esploren física y conceptualmente los llaberintos creaos poles corporaciones y empreses multinacionales pa tratar col veceru, nesti casu’l públicu. Dédalo España ye una corporación creada con esa finalidá qu’usa les estratexes de comunicación de les empreses reales, concentraes y amplificaes. «Visite les nuestres instalaciones nueves, va ser una cosa inolvidable».
Caldía aceptamos permanentemente cientos d’alcuerdos y condiciones d’usu ensin ser sabedores d’eso. Esto ponnos en rellación directa coles corporaciones énte la llei. Al sacar una entrada pa un conciertu, al abrir una páxina web, aceptamos decenes de cláusules que desimen a la organización de toles responsabilidaes imaxinables, y cárguennos a nosotros cuestiones de les que nun conocíemos nin siquiera la existencia. El volume d’estos contratos pantasma ye tan apolmonante que nun tenemos tiempu real suficiente pa buscar y lleer – y muncho menos comprender – qué ye lo qu’aceptamos ensin conocimientu. Y menos revisar los que siguen vixentes a lo llargo de la nuestra vida, yá que «los términos pueden camudar ensin avisu previu».
Estes estratexes tán definíes pola política empresarial, bona conocedora de la “cultura de la víctima”. Si un epígrafe nel contratu pue aforrar una indemnización, cien epígrafes van aforrar cien indemnizaciones. Si amás incluyen referencies cruciaes que torguen una comprensión correcta, yá tien un contratu de “términos y condiciones”.
L’otru frente de comunicación de les empresas son los teléfonos d’atención al veceru. Les organizaciones tracen sistemes complexos con una montonera de departamentos pa entretener al veceru na busca d’una solución a un problema simple. La fórmula ye básicamente amestar más problemes pa facer de dalgo pequeño un problema grande que nun podamos o sepamos manexar.
¿Paróse a lleer les normes de seguranza del fabricante primero de prender l’ordenador?
“Al calcar el botón de prendíu declara que lo fixo”.
Dédalo España ye’l proyectu ganador de la IV Convocatoria del Premiu LABJoven_Experimenta, entamáu conxuntamente por LLABoral Centru d’Arte y Creación Industrial y la Conseyería de Cultura y Turismu (Institutu Asturianu de la Mocedá)