Ryoji Ikeda. Datamatics

2 marzu – 17 setiembre 2012

data.tecture [5 SXGA+ version]

data.tecture [5 SXGA+ version], gran instalación audiovisual nueva de Ryoji Ikeda, ufierta al visitante una esperiencia dafechu inmersiva y sensorial.

Nella, proyéctase una única y gran imaxe de videu directamente sobre’l suelu del gran espaciu espositivu de LLABoral dende cinco proyectores, somorguiando’l cuerpu, la vista y l’oyíu del espectador.

Una reorquestación artística de datamatics [ver.2.0] (2006-), el conciertu audiovisual tan aclamáu d’Ikeda, data.tecture [5 SXGA+ version] esplora’l potencial pa percibir la multisustancia invisible de datos qu’empapa’l nuestru mundu. Usando datos puros como fonte de soníu y de composiciones visuales, datamatics [ver.2.0] combina presentaciones astractes y mimétiques de materia, tiempu y espaciu nuna pieza tan poderosa como algamada asombrosamente. A partir de secuencies 2D de patrones derivaos d’errores de discu duru y estudios de códigu de software, la imaxinería tresfórmase nunes visiones dramátiques y alredor del universu en 3D, coles escenes finales amestando una dimensión estra como consecuencia d’un procesáu matemáticu tetradimensional qu’abre unes vistes espectaculares y aparentemente infinites.

Operando colos principios primarios de datamatics [ver.2.0], pero deconstruyendo y recomponiendo, no conceptual, los sos elementos orixinales —tresformaciones, visualizaciones y sonificaciones d’una gran cantidá de datos científicos, como ADN del xenoma humanu, coordenaes astronómiques d’estrelles nel universu, estructures moleculares de proteínes y inclusive datos de la propia arquitectura de datamatics— esta obra nueva, data.tecture [5 SXGA+ version], da pie a una especie de metadatamatics. Nella, Ikeda recurre a computaciones de programa en tiempu real y al escaniáu de datos pa crear una astracción, mayor inclusive, de la datamatics orixinal. La dinámica técnica de la pieza, como la frecuencia —acelerada estremadamente— d’imáxenes y la fondura de bits variable, afonda nel desafíu y la esploración de los oríxenes de les nuestres percepciones.