(Ready) Media

15 abril – 25 ochobre 2015

Camín d’una arqueoloxía de los medios y la invención en México

La esposición ufierta una llectura crítica del archivu visual axuntáu a lo llargo de los diez años de vida del Laboratorio Arte Alameda de México D.F, espaciu dedicáu a la exhibición, documentación y investigación de les práctiques qu’usen y ponen en diálogu la rellación ente arte y tecnoloxía na Ciudá de México.

(Ready) Media ta centrada na práctica artística rellacionada con medios y tecnoloxía, amás de nes preguntes estético-polítiques qu’esta práctica provocó en México dende primeros del sieglu XX. Esta investigación fecha pol Laboratorio Arte Alameda surde de la invitación a un grupu de comisarios, artistes y investigadores a facer una interpretación del archivu. El resultáu d’esti trabayu foi esta serie audiovisual de más de 23 hores de duración que presenta alredor de 200 obres de los artistes mexicanos más representativos nesti campu. Les siete secciones foron escoyíes por Juan Pablo Anaya y Gabriela Méndez, Jesse Lerner, Grace Quintanilla, Liliana Quintero, Manuel Rocha Iturbide y Israel Martínez, Bruno Varela, Erandy Vergara, David Wood y poles propies directores del proyectu, Karla Jasso y Tania Aedo.

(Ready) Media nun quier marcar llinies definitives d’interpretación del arte electrónicu o tecnoloxicu en México, sinón que busca propiciar un primer movimientu baxo la óptica de conceptos como’l de l’arqueoloxía y el «tiempu fonderu de los medios», como lu definió Siegfried Zielinsky. Esti proyectu quier asitiar y marcar rellaciones con esperiencies anteriores, alcontrar y observar la “novedá nel pasáu”, amás de cuestionar la “novedá” nel imaxinariu del presente. Tamién l’usu que los artistes dan a los medios «nuevos» anguaño, el valor que la esfera cultural-yos otorga y les maneres como éstos subvierten el xuegu d’interacción coles tendencies globales de la sociedá de la información.