LLABoral Centru d’Arte y Creación Industrial presenta Nowhere/Now/Here, una esposición sobre diseñu esperimental, entamada por El Último Grito, asociación creativa formada por Roberto Feo y Rosario Hurtado. Con estudiu en Berlín y Londres, dambos comisarios propónense’l retu de superar la percepción clásica del diseñu pa repensar la nuestra rellación col entornu. Al garrar como puntu de partida la perspectiva de que’l nuestru entornu pasó a formar parte de nós ensin que nós formemos parte d’él, Nowhere/Now/Here anímanos a considerar el diseñu como un componente integral del procesu que conforma’l mundu.
Trés temes clave de la esposición embárquennos nun viaxe inspirador al traviés de les visiones, los enfoques y les reflexones personales sobre cómo podemos tresformar la manera en que vivimos:
Resistencia cultural: reformula la idea de lo que supón la cultura na actualidá y les munches formes de percibila, llanza una provocación a los sistemes existentes y propón alternatives nueves nun contestu socioeconómicu y relixosu. De la mesma manera, ufierta una oportunidá de descubrir narratives nueves al respective d’un oxetu, amás de cambeos culturales na profesión del diseñador.
Esploración psicolóxica: investiga la nuestra forma d’entender un oxetu a nivel psicolóxicu. Esti tema examina cómo nos rellacionamos y reaccionamos emocionalmente delantre d’un oxetu y cómo dexamos que nos tresllade a sitios y momentos distintos.
Intervención material: analiza les ferramientes, materiales y tecnoloxíes nueves que s’apliquen a los procesos contemporáneos de diseñu y fabricación. Amás, esti apartáu trata de la interferencia ente’l consumismu y la ecoloxía. Esplora tamién la influencia de la influencia gráfica y espacial nel nuestru comportamientu, amás de la nuestra rellación col espaciu y los oxetos.
Nowhere/Now/Here presenta más de 60 obres qu’incluyen dende productos cotidianos, moda o xoyes, hasta instalaciones y muestres en directo de diseñadores renomaos, como Tord Boontje, Jerszy Seymour, Santiago Cirugeda, Dunne&Raby, con diseñadores emerxentes como Martino Gamper, Paul Cocksedge, Assa Ashuach, Troika, estudiantes y llicenciaos de recién como Raw Edges, Dash Macdonald y Nacho Carbonell, ente otros. Un aspectu esencial pa Nowhere/Now/Here ye la contribución de cuatro maestros: Ron Arad, Gaetano Pesce, Javier Mariscal y Daniel Weil, quien contestualiza’l trabayu de la xeneración moza al traviés d’una riestra d’entrevistes y dalgunes de les sos obres.
El diseñador presenta davezu la idea d’un mundu personalizáu, más funcional y a la fin meyor al traviés de grupos formulaos sobre la noción del contestu non llinial, que nun identifica una disciplina, técnica o material común, sinón que crea una unidá que s’evoca al traviés de l’asociación d’idees. Esti viaxe conceptual entamáu por El Último Grito atraviesa espacios en niveles variaos con formes hexagonales diseñaos por Patricia Urquiola y Martino Berghinz, amás de la visión y la imaxe gráfica de Fernando Gutiérrez.
Nowhere/Now/Here ufierta la oportunidá de reflexonar alredor de cómo’l diseñu y la tecnoloxía pueden cambiar les nuestres vides, los nuestros sistemes y el nuestru entornu, enfoque que caltuvo El Último Grito de magar empezó’l so llabor creativu. Esti dúu tuvo como constante na so trayectoria l’alloñamientu de les definiciones preconcebíes pa investigar formes nueves d’entender el diseñu contemporaneu. Roberto Feo y Rosario Hurtado camienten que Nowhere/Now/Here tien que ser un primer pasu de dalgo que va tener continuación. Cola so propuesta pa LLABoral quixeron «empezar un capítulu, en cuenta de zarralu».