Marta Medina. Mov. Ámate Ur.0x

24 ochobre – 13 avientu 2015

Un proyectu desenvueltu pola artista Marta Medina na so residencia en LLABoral, nel marcu de RASPA

Esta instalación ye’l resultáu final d’una residencia artística y una presentación escénica previa, creada a partir de les inquietúes de l’artista Marta Medina pa colos escesos (pulsiones, ausencies, catarsis, esparrames). Obres como Días de vino y rosasEl traje nuevo del emperadorQue se mueran los feosEl cluedoThe piano has been drinking not me…, son la base de la creación d’esti proyectu, onde s’articulen dellos llinguaxes como danza, audiovisuales, ambientes llumínicos y atmósferes sonores desenvueltes pol músicu NON-ERGO.

Mov. Ámate Ur.0x muéstrase al públicu como una instalación interactiva, convirtiendo al espectador en protagonista que forma parte de la proyección en tiempu real. La interactuación provoca una evolución y cambéu constante sobre l’audiovisual orixinal al traviés de la superposición del material producío por acciones espontánees del públicu. Les imáxenes, de resolución baxa y distorsionaes técnicamente, prefiguren una realidá revelada sobre’l propiu ser, non personal, onde nos vemos inmersos.

La pieza Mov. Ámate Ur.0x, frutu de la residencia de producción de Marta Medina en LLABoral, forma parte de RASPA – Red Asturiana de Performance y Acción, qu’impulsó’l calter interactivu y tecnolóxicu de la pieza, permitiendo la so trescendencia acullá d’una presentación escénica.

La inauguración de la pieza desenvuélvese al traviés d’una performance de Marta Medina, Cía. La Infiltrada, dientro de les xornaes de Danza Xixón, proyectu coordináu dende la Fundación Municipal de Cultura, Educación y Universidá Popular, qu’aúne programes y acciones cola mira de fomentar la creación, la producción y la difusión de la danza contemporánea y l’espectáculu xestual en Xixón.