La mujer invisible, 2019

4 marzu – 4 abril 2020

Una obra de Cristina Busto

La película básase nel últimu capítulu de “El segundu sexu” de Simone de Beauvoir, “La muyer independiente”, una parte del llibru cola que l’artista s’identifica sobre manera.

Nél, descríbese a una xeneración de muyeres que conquistaron llogros importantes nel terrén llaboral y social; sicasí, tovía tienen que siguir lluchando pa consiguir la igualdá de derechos plena. Como artista y muyer, viviendo’l momentu presente, Cristina Busto quier corresponsabilizase, dende la práctica artística, na conquista d’esi terrén que nos pertenez, creando símbolos y referentes nuevos que representen a toles muyeres.

La mujer invisible usa animación “tradicional” mecida con imaxe real nuna edición mui plástica. Parte del material que contién el videu final avérase al arte urbanu al traviés de plantiyes y pegatines cola imaxe de Simone de Beauvoir y les sos frases, que siguen reivindicando dende les parés de la ciudá d’Avilés, onde vive l’artista.

En La mujer invisible, una vez más, Cristina Busto fala d’ella mesma y espónse como obra dientro de la so cotidianeidá, la so realidá, la so confusión, la so madurez, reflexonando sobre la moda, la vieyera, la feminidá, la sororidá, la sensualidá, l’amor o la soledá.

La pieza producióse al traviés del programa Wom@rts. Wom@rts ye un proyectu européu que cunta col sofitu de la Comisión Europea al traviés del Programa Europa Creativa hasta’l 2021. Esti Programa destínase a fomentar l’impulsu y desenvolvimientu de los sectores culturales y creativos, con énfasis especial nel sofitu a los profesionales, los artistes y organizaciones culturales y audiovisuales, amás de les artes escéniques, de les belles artes, de la edición, el cine, la televisión, la música, les artes interdisciplinaries, la lliteratura, el patrimoniu y la industria de los videoxuegos. La so función ye promover una medría intelixente, sostenible y integradora, dende una perspectiva paneuropea, como ye’l casu del proyectu Wom@rts. Wom@rts vincula la iniciativa pública y la privada ensin ánimu d’arriquecimientu con diez instituciones participantes:

1. Conceyu de Santiago de Compostela – Auditoriu de Galicia (España).
2. Women in Film and Television WIFT (Finlandia).
3. Viesoji istaiga Vilniaus rotuse – Casa de Cultura del Conceyu de Vilnius (Lituania).
4. Centre Audiovisuel Simone de Beauvoir (Francia).
5. Communauté d’Agglomération du Grand Angoulême (Francia).
6. Limerick Institute of Technology – Limerick School of Arts & Design (Irlanda).
7. Hay Festival of Literature and the Arts Ltd. (Reinu Uníu).
8. Academy of Applied Arts University in Rijeka (Croacia).
9. UGM Maribor Art Gallery (Eslovenia).
10. Conceyu d’Avilés / Fundación Municipal de Cultura (España).