Diz la ciencia ficción andina que les murueques nun son un niciu del pasáu sinón una clave pa lleer el porvenir. Testigu d’un mundu llonxanu, cada murueca lleva con ella un rellatu míticu coles sos histories d’oríxenes y los sos deseos pal futuru. Agora que nos adientramos na Sesta Estinción, con un ritmu de desapaición d’ecosistemes de dar vértigu, ye quiciabes bon momentu pa volver la mirada a otres estinciones –remotes nel tiempu o nel imaxinariu, too depende de la perspectiva– y a la manera en que nos rellacionamos colos colapsos en cursu: con qué saberes y tecnoloxíes, qué mitos y ficciones, dende qué idea de porvenir.
Esta esposición muestra proyectos artísticos que, dende ángulos diversos, traten sobre mundos desapaecíos o na llende del desaniciu. Entama nos Andes, con una obra inspirada nos sistemes de cálculu precolombinos que cayeron nel olvidu cola colonización, y acaba na zona cero de la ruina medioambiental, les mates de l’Amazonía. Les buelgues d’estes van falar un día de la civilización que les vio acabar. Ente estes obres, que faen alusión a dambes estinciones –una afondada nel pasáu, otra probablemente futura– espliéguense otres: reales o imaxinaes, técniques y ecolóxiques, humanes o non. Toes tienen en común que, igual que les murueques, condensen munchos tiempos y significaos al empar. Cada estinción ye un mensaxe encriptáu qu’un mundu que desapaez dexa pal siguiente.