Esposición: Noemí Iglesias y Celia Viada

13 a 30 xineru 2021

Premios LABjoven_Los Bragales 2020

LABjoven_Los Bragales ye un programa de sofitu a la producción d’artistes mozos/es asturianos/es o residentes n’Asturies, promovida pol empresariu y coleccionista cántabru Jaime Sordo, dueñu de la Colección Los Bragales. Al traviés d’una residencia de producción más d’una decena d’artistes de la rexón pudieron producir proyectos ambiciosos que se mostraron nes sales del Centru d’Arte.

Esta convocatoria, na so decimosegunda edición, viose tamién travesada pola pandemia que marca l’añu 2020. Nesta ocasión concediéronse dos premios en cuenta d’ún, pa proyectos amañosos pa mostrar per internet.

Los resultaos d’esi trabayu muéstrense nesta esposición presencial y n’otra virtual accesible al traviés de https://virtual.laboralcentrodearte.net/.

Dambos proyectos propónennos tamién reflexones que nun son ayenes a tolos cambeos asocedíos nos últimos meses, ayudándonos a pensar sobre’l presente y el futuru del mundu contemporaneu dende una perspectiva crítica.

Celia Viada Caso
Horos kyklos = límite de la rueda, 2020

Horos kyklos = límite de la rueda ye una instalación audiovisual compuesta por una pieza de videoarte, fotografíes y testu. Parte de les reflexones qu’abre l’artista Hito Steyerl n’artículu “En cayida llibre, un esperimentu sobre la perspectiva vertical” (2011). Steyerl vincula la evolución de la representación dominante de la perspectiva con distintos momentos históricos y argumenta que vivimos nun contestu de cayida llibre.

Esta instalación quier cuestionar el significáu de “horizonte” como un conceptu vinculáu dafechu a un sistema capitalista, colonial, patriarcal, racista y violentu.

Noemí Iglesias Barrios

Off Love, 2020

Les aplicaciones dixitales de cites online posicionáronse nos últimos tiempos como la respuesta más efectiva frente a les midíes actuales de distanciamientu, aumentando considerablemente tanto la oferta del sector como la demanda de los usuarios.

Nesti contestu preséntase Off Love, un análisis sobre’l sentíu de los vínculos que se formen en y pente medies d’internet. L’oxetivu del proyectu ye ofrecer una reflexón sobre esti modelu estandarizáu y repetitivu que propón el mercáu dixital onde les emociones espónense a la manipulación pública, limitando y fragmentando la nuestra capacidá de cercanía emocional.