Circuitos

27 ochobre – 25 payares 2016

XXVI edición de Circuitos d’Artes Plástiques 2015. Comunidá de Madrid

La esposición Circuitos ye’l resultáu de la XXVI edición de la convocatoria pa la promoción del arte mozu de la Comunidá de Madrid, empobinada a impulsar la creación artística y l’averamientu del públicu a les práctiques artístiques d’anguaño. Los diez proyectos que la conformen foron escoyíos por un xuráu independiente a partir d’una convocatoria abierta y reflexen la heteroxeneidá que define l’ámbitu creativu actual, marcáu pola facilidá d’accesu a la información y la movilidá de los artistes. Respetando les perspectives variaes de los autores, dientro de la escelencia, esta selección convida a trazar llinies imaxinaries ente los puntos en común que conformen una xeneración.

Circuitos preséntase agora en LLABoral Centru d’Arte y Creación Industrial, gracies a la collaboración col Principáu d’Asturies, xunto a una esposición nueva desenvuelta a costafecha pa la sala Borrón d’Uviéu. Esta collaboración propicia’l intercambéu y la comunicación nel ámbitu creativu nacional y convida a los artistes a siguir avanzando nos sos trabayos: a comprendelos meyor aceptando’l retu d’adaptalos a un espaciu nuevu, LLABoral, y les sos audiencies. Un retu que va más allá na sala Borrón d’Uviéu, onde’l proyectu s’esparde al traviés d’una esposición vinculada estrechamente a la orixinal, onde se presenten los trabayos previos o paralelos fechos polos artistes a lo llargo del procesu de culminación de les obres gallardonaes.

Dambes esposiciones compleméntense y multipliquen por dos les posibilidaes de desenvolvimientu de los artistes, tanto como de disfrute del espectador que, dende los secretos de taller de Borrón hasta la puesta n’escena de LLABoral, va poder averase a les poétiques d’anguaño.