Cinco años de Ladines

17 xunu – 3 ochobre 2011

Cuco Suárez, artista asturianu conocíu poles sos performances y instalaciones, fundó’l Centru d’Investigación Artística Ladines que, posteriormente, diba pasar a llamase Fundación de Arte Ladines, nel llugarín asturianu de Llaíñes. L’edificiu inauguróse nel 2005, con una instalación del artista y performer Marcel·lí Antúnez Roca, ún de los fundadores de la compañía teatral catalana de vanguardia tan renomada La Fura dels Baus.

Dende entós, la Fundación de Arte Ladines abellugó a bien d’artistes en residencia y foi sede d’alcuentros, talleres y seminarios diversos. Esta esposición ufierta una perspectiva de trabayos desenvueltos na Fundación de Arte Ladines y ta acompañada por trés proyectos d’artistes asturianos: una riestra de semeyes de Fiumfoto (Cristina de Silva y Nacho de la Vega); la segunda instalación, realizada por Natalia Pastor y Vicente Pastor, presenta al traviés de dellos vídeos aspectos diversos de la vida rural. El tercer proyectu ye otra videoinstalación, obra d’Adolfo Manzano, Piru de la Puente y Roberto Serrano, onde se refier a la naturaleza complexa de les rellaciones que los seres humanos tienen cola naturaleza.

Como complementu a la muestra, los documentos archivaos na Fundación de Arte Ladines van permanecer espuestos na Mediateca_Archivu de LLABoral nel trescursu de tola esposición.