Años Luz: Mécaniques Discursives

22 xunetu 2021 – 23 xineru 2022

Diez años de trabayu y collaboración ente Fred Penelle y Yannick Jacquet, -tamién cofundador y actual miembru del colectivu Antivj- caractericen un esperimentu creativu insólitu y cambiante, llamáu Mécaniques Discursives. Trátase d’un work in progress espresáu al traviés d’un espaciu narrativu envolvente, frutu d’una unión mui estrecha ente la tradición del grabáu y la innovación dixital.

El resultáu d’estes práctiques artístiques distintes y al empar complementaries, la versión más recién d’esta metanarrativa visual y sonora –Mécaniques Discursives– inaugúrase en LLABoral Centru d’Arte, como parte del programa conxuntu del 15.u Aniversariu de LEV Festival, patrocináu pola Fundación EDP, dientro del programa d’Años Luz.

La obra va ocupar dafechu los 700m2 y 12 m d’altura de la Sala de Proyectos del Centru d’Arte. Con una puesta n’escena apoteósica, Mécaniques Discursives ufre nesta ocasión les mayores dimensiones qu’enxamás realizaren dambos artistes nuna sala d’esposiciones.

La lluz de más de 15 proyecciones simultánees y inmersives ye, polo tanto, tamién la protagonista de la obra. Estes proyecciones animaes a escala pequeña y grande van dar vida a más de 250 elementos narrativos. Ente toos formen un paisaxe visual y sonoru, habitáu por enxendros fúnebres y configuraciones gráfiques y visuales llúcides.

Tola Sala de Proyectos de LLABoral conviértese asina nun escenariu xigantescu habitáu por quimeres rares, un mundu disruptivu, conformáu por realidaes cada vez más complexes y inintelixibles, ablucáu polos avances tecno-científicos y alteriadures medioambientales en cursu.

Nesta instalación, estos seres animaos y inertes espárdense pel suelu y les parés. Conectaos por múltiples llinies narratives y señales llumíniques, la obra tresmite la sensación d’un pasáu presente, con una zona d’escuridá onde siguen cohabitando los ecos de la era de Gutenberg y del Big Data.

El públicu ye parte integrante de la obra; muévese llibremente per un mundu imaxinariu y al mesmu tiempu apalpable, de más de 500 años d’historia. Munchos elementos simbólicos fáense ecu de les lluces y solombres d’un mundu complexu d’esperiencies y conocimientos entrellaciaos. Esta inmersión nun espaciu-tiempu espandíu, convida a cada visitante a convertise nun actor y activu más d’un texíu apasionante de rellatos ensin fin. Garrar cualquiera de los sos filos entecruciaos, convídanos a dexanos llevar y descubrir el potencial del nuestru propiu imaxinariu, pa filar otres conexones y bucles narrativos posibles.

Por cuenta del fallecimientu prematuru de Fred Penelle nel añu 2020, esta instalación va ser tamién l’últimu trabayu conxuntu y un homenaxe bien sentíu al artista ausente.