Angélica Liddell. Emily

21 agostu – 27 setiembre 2015

Instalación sonora resultáu de la residencia de producción d’Angélica Liddell nel LLABoratoriu de Soníu

Emily surde del escandilamientu de la escritora, directora d’escena y actriz española Angélica Liddell pola poeta norteamericana Emily Dickinson, quien pasó gran parte de la so vida zarrada nun cuartu de la casa del pá n’Amherst, quedando la so gran obra inédita hasta 1955, munchos años después de la muerte de l’autora.

Ye, sobre manera, parte de la investigación que, na so residencia de producción en LLABoral, realiza l’artista. Pa esti trabayu, Angélica Liddell garra una de les palabres que más se repite nos versos de Dickinson, abeya, cola mira de “dar voz al caos qu’edificó una poética: el marmullu de les abeyes, los cantos de los indios de Massachusetts, el ruíu y la furia de Shakespeare y unos poemes que Dickinson lleía al revés, los sos propios poemes”. La propia poeta rellata nuna carta qu’esta forma de lleer “cuando nos somorguiamos nellos dende’l principiu trestórnanos”.

“Yo fíxilo (a menudo, munches veces)”, diz Liddell: “Dalgo domina la mente. Va quedar rexistrada, polo tanto, esa inversión porque namás al traviés del caos, nesti casu sonoru, se-y devuelve al mundu la so harmonía, namás al traviés de la inversión se domina la mente”.

La instalación asitiada nel LLABoratoriu de Soníu de LLABoral incluye una gran urna de metacrilatu que dientro tien mediu millar d’abeyones. El zumbíu d’esos animales, la proyección del primer videu rexistráu sobre los indios americanos -contemporaneu a Emily Dickinson- y la d’otru audiovisual que recueye los ensayos preparatorios d’Esta breve tragedia de la carne, xunto a una selección de testos de Shakespeare y el fragmentu Jesus bleibet meine Freude (Jesús sigue siendo la mio allegría) de la Cantata BWV 147 de Johann Sebastian Bach xeneren una narrativa sonora y visual de la que surde Emily.

Xunto a Emily, Angélica Liddell prepara en LLABoral la producción d’Esta breve tragedia de la carne, obra que va estrenase na 39 edición de La Bâtie-Festival de Xinebra, institución que xunto al Centru d’Arte y Creación Industrial coproduz dambes pieces.