Andy Gracie. 200 metros

30 xunetu – 30 avientu 2015

‘200 metros’ ye’l proyectu ganador de la beca de producción Ciencies de la Mar, una convocatoria conxunta de LLABoral y l’Autoridá Portuaria de Xixón empobinada a artistes asturianos que nel so trabayu usen la ciencia y tecnoloxía en rellación a la mar y l’océanu

200 metros ye una instalación inmersiva que recueye los datos sensoriales y de mapéu obteníos por un aparatu subacuáticu na contorna del Cañón d’Avilés, una resquiebra abisal que ta a unes siete milles de la costa asturiana, ente Colunga y Navia, que constituye ún de los ecosistemes más diversos de la plataforma del Cantábricu.

Conceptualmente, el proyectu céntrase na esploración de los cambeos físicos, fenomenolóxicos, xeolóxicos y sensoriales que se producen na llende ente la mar y el fondu marín. El fondu marín ye ún de los grandes desconocíos, como lo ilustra’l fechu de que ye menos conocíu que, inclusive, la superficie de la lluna. Y, sicasí, ye un sitiu y una contorna qu’ufierta munches narratives y contestos físicos, emocionales y filosóficos.

Pa la producción d’esta obra, Andy Gracie desenvolvió una residencia artística en LLABoral en trés fases. La primera d’ellas centróse nel diseñu y execución d’un aparatu híbridu subacuáticu, onde se combinen elementos estándares y otros fechos a midida de DIY (Do It Yourself) y prototipáu rápidu: sónar, cámara y un hidrófonu pa facilitar el mapéu y rexistru de los fenómenos nel fondu marín.

Más tarde, a últimos de xunu, l’artista, acompañáu de trés técnicos y ayudantes, fai una espedición de trés díes al Cañón d’Avilés nel Ramón Margalef, el buque d’investigación oceanográfica d’España más modernu y sofisticáu. La recoyida de datos fíxose en collaboración col Institutu Español d’Oceanografía (IEO). Garróse como zona d’estudiu la Estación 2 del Radial de Cuideiru. Ellí, el prototipu submarín desenvueltu por Andy Gracie y el FabLLAB Asturies somórguiase a 200 metros na mar pa recopilar referencies, grabaciones sonores y audiovisuales de la contorna. Mentes, una balsa flotante, tamién construyida nel Llaboratoriu de Fabricación Dixital de LLABoral, dotada con un sónar y equipos informáticos, cartografia’l fondu marín, tanto de la zona na que se centraba l’esperimentu como a lo llargo del pasu del Ramón Margalef camín de los destinos onde tenía de facer los sos propios esperimentos.

Na Sala d’Esposiciones de l’Autoridá Portuaria de Xixón confluye’l resultáu artísticu d’estes investigaciones, tanto al traviés d’un espaciu inmersivu como d’una zona de documentación onde s’incluye bona parte del material recopilao y producío pa la execución de 200 metros, presentando una narrativa nueva del fondu marín.