Algo fluorescente

24 xunetu – 12 agostu 2015

Instalación sonora multicanal sobre la deformación producida por Roc Jiménez de Cisneros pal LLABoratoriu de Soníu a lo llargo de la so residencia en LLABoral

Bona parte del trabayu musical de Roc Jiménez de Cisneros parte de la idea de la deformación. La deformación como analoxía simbólica y como elementu formal nun sentíu estrictu. Dende la perversión d’estereotipos y cánones estéticos hasta l’actu de deformar soníos y los sos parámetros básicos pa qu’estos dexen de ser reconocibles fácilmente.

Algo Fluorescente propón (impón, cuasi) una esperiencia d’escucha prollongada pa poder apreciar les fases variaes d’esa deformación. Una rede de soníos comodín, iconos anónimos de la música de baille, materialízase y caltiénse aparentemente estática, un ensamblamientu de fragmentos sonoros pequeños más o menos reconocibles que pierden la identidá amodo, hasta convertise n’otros soníos.

Pero, como ye vezu nes pieces de Roc Jiménez de Cisneros y EVOL (el grupu que comparte col artista escocés Stephen Sharp), l’apreciación de los puntos estremos de la tresformación nun ye lo más relevante equí. La instalación convida más bien a reparar en tolos estaos intermedios, amás d’a aceptar unes normes distintes del pasu del tiempu na esperiencia musical. La cronestesia, la conciencia del tiempu suxetivu, quier dicise, non la midida cronométrica sinón la esperiencia que tien caún del pasu del tiempu, que ye distinto a cuando se mide’l tiempu con un reló o un calendariu) ye tanto resultáu de la pieza como’l so vehículu principal.

Roc Jiménez de Cisneros trabayó mentes fixo la residencia en LLABoral na creación d’un kit de tipos móviles de madera usando’l cortador láser del FabLLAB Asturies, Llaboratoriu de Fabricación Dixital del Centru d’Arte. Esta tipografía móvil, que va usase más alantre pa los proyectos gráficos d’EVOL, forma parte de la instalación que se muestra nel LLABoratoriu de Soníu. El componente visual ocupa un sitiu preferente nes publicaciones d’EVOL, colectivu que tradicionalmente esperimentó cola gráfica de les sos publicaciones a partir de formatos nuevos y idees de presentación.